Mario Muscat

Mario ilu fl-industrija ta l-iddisinjar tal-bnadar mill-1992 meta, dak iż-żmien, kien jagħmel dan ix-xogħol bħala 'part-time'. Imwieled f'Ħal Tarxien hu minn dejjem kien iżomm il-festa parrokkjali bħala ġurnata, jew aħjar, żmien mill-aktar speċjali tas-sena u kienet propju din id-devozzjoni li ħeġġitu sabiex jibda dan l-artiġġjanat daqshekk sabih. Bil-mod il-mod il-kelma bdiet tinxtered u l-isem 'Mario tal-Bnadar' malajr sar magħruf mhux biss f'Ħal Tarxien imma saħansitra f'Malta kollha b'tali mod li ismu sar sinonimu mal-bnadar. Dan is-suċċess kompla inkuraġġih sabiex jiddedika aktar ħin għal dan ix-xogħol li kien daqshekk għall-qalbu u dan wasslu sabiex fl-2003 ħa d-deċiżjoni li x- xogħol primarju tiegħu ikun l-iddisinjar u l-pittura tal-bnadar. Ovvjament deċizjoni bħall din mhix xi waħda faċli u din turi s-serjeta li Mario jiehu x-xogħol tiegħu, xogħol li litteralment qiegħed iħalli s-sinjal tiegħu madwar Malta kollha. Uħud mix-xogħolijiet tiegħu jinkludu l-bandiera tal-Każin Banda San Anard ta' Ħal Kirkop, il-Każin Banda San Ġuzepp tal-Ħamrun u l-Każin Banda Maria Annunzjata ta Ħal Tarxien li hi waħda mill-aktar bnadar favoriti tiegħu.